Ben Madilynn
Magpapili pagbalik sa eleksiyon karong Mayo 2025 ang magtiayong Nicepuro ‘Nice’ ug Mercy Apura, kinsa pulos kanhi sa mayor sa Dakbayan sa Carcar.
Si Mercy Apura mokandidato og pagbalik sa pagkamayor samtang ang iyang bana nga si Nice magpapili isip konsehal ubos sa Green Team sa iyang asawa.
Si incumbent Vice Mayor Efren Quijano nibuwag sa partido ni kasamtangang Mayor Patrick Barcenas, maoy running mate ni Mercy.
Ang kompleto nga line-up sa Greem Team ni Apura pormal nga gipaila sa publiko atol sa press conference sa Carcar niadtong Dominggo, Septiyembre 22, 2024.
Ang mga konsehal mao sila si Ian del Rosario (incumbent), Mae Tabora (incumbent), Atty. Mich Zozobrado (incumbent), Richard Barangan, Kim Lapinid, Kashii dela Cerna Apostol, Engr Marco Esparto, Ed Lawas, Carlo Aldemita, ug Nice Apura.
Matod ni Mercy nga ang Green Team nagpabilin nga kaalyado sa partido Alayon ug One Cebu.
Atol sa presscon, si Quijano nipadayag nga nibalhin sa kampo sa mga Apura kay wala na masubay iyang gipanglantaw sa iyang kanhi kauban sa partido.
Matod niya nga wa na siya mananghid ni Barcenas sanglit dugay na sab nga wala sila magkaestorya.
Dason niya nga gipangandaman na niya kining tanan niyang desisyon.
Samtang, si Mercy nipadayag nga nibalik siya kay daghang plano nga proyekto ubos sa iyang pagdumala niadto ang wa napatuman sama sa city hospital, terminal ug livestock auction market.
Ang pagduso sa cerrificate of candidacy (COC) magsugod na karong Oktubre 2, 2024./GPL
