86-anyos gipatay sa anak, mga apo

DAVAO DEL NORTE — Namatay ang 86-anyos nga amahan human gitabangan og atake sa iyang anak ug mga apo sa Purok 1, Barangay Santa Fe, New Corella alas 2:20 sa udto, Miyerkules, Mayo 28, 2025.

Ang biktima mao si Bernabe Pal, biyudo, mag-uuma, ug molupyo sa nahisgutang dapit.

Samtang ang gitumbok nga mga suspek mao ang anak niini nga Romeo, 62-anyos, minyo, mag-uuma ug mga apo nga sila Reynaldo, 23-anyos, ug Arnold, 28-anyos, pulos mga ulitawo, mag-uuma ug mga molupyo sa samang dapit.

Base sa inisyal nga imbestigasyon sa kapulisan, gikompronta sa biktima ang mga suspek ug giakusahan nga maoy nangawat sa binuhi niyang mga manok.

Matud pa nga ang gihimong pag-akusa, misangko sa lalis ug maoy hinungdan nga nihulbot sa gitakin niyang .38 caliber pistol ang biktima ug gipusil ang suspek nga si Reynaldo apan wa maigo.

Sumala pa nga dali lang nadis-armahan sa mga suspek ang biktima dayong gitabanga’g sumbag ug patid samtang si Romeo nagbunal og kahoy’ng madre de cacao ang likod nga bahin sa ulo sa biktima nga miresulta sa hinanaling kamatayon niini.

Nasikop sa mga barangay opisyales ang mga suspek ug gitunol ngadto sa New Corella Municipal Police Station, uban sa .38 caliber nga armas nga wala’y serial number apan kargado og lima ka mga buhing bala.

Samtang patay’ng lawas sa biktima gidala sa Twins Funeral Homes sa Purok 5, Poblacion, New Corella alang sa tukmang disposasyon. (Dexter T. Visitacion)