71 anyos mikulata sa misis; gipapriso sa anak

BALHOG sa Mabolo Police Station ang 71-anyos nga lolo human namunal og tubo ug nisuway pagdunggab sa liog sa iyang 67 anyos nga asawa alas 7:40 sa gabii, Martes, Hunyo 3, 2025 sa Cashra Nivel Hills, Barangay Lahug sa Dakbayan sa Sugbo.

Ang suspek naa sa temporary custodial facility sa Mabolo mao si alyas Restituto, 71, residente ra sab sa maong lugar.

Ang nidakop kaniya mao ra sab ang kaugalingong anak nga 40 anyos nga nakakita sa pagdapat sa iyang inahan.

Matod sa anak nga si alyas July nga nakita niya nga gibunal-bunalan sa iyang amahan og PVP pipe ang ulo sa iyang inahan ug wala pa matagbaw nikuha og kutsilyo aron dunggabon unta ang liog sa biktima maayo nalang nga iya ning napugngan.

Tungod sa naangkon nga samad sa biktima gidala kini sa usa ka pribadong tambalanan.

Matod sa suspek nga tungod sa iyang kahubog wala na siya masayod sa iyang gihimo ug natingala na lang siya nga naa na siya sa police station.

“Wala gyud ko makahinumdom unsay nahitabo kay pwerti nakong huboga, wala sad ko kahinumdom unsay among giawayan,” matod ni Restituto.

Nibutyag siya nga sa tibuok nila nga pagpuyo sa iyang asawa karon pa kini mahitabo nga nadapatan niya kini.

Nag-inom sila sa iyang higala ug nakahurot sila og duha ka botelya nga ilimnon nga makahubog ug wala na siya masayod sa iyang gibuhat.

Tungod sa iyang nahimo nangayo siya og pasaylo sa iyang asawa lakip na sa iyang mga anak nga nahimo niya ang pagpasakit sa ilang inahan. / AYB