Ben Madilynn
Sa unom ka mga tripulante sa usa ka panagatan nga nanagat sa kadagatan sa Lungsod sa Madridejos, Lalawigan sa Sugbo ang gipamusil sa wa pa mailhing mga suspek, usa ang patay.
Ang maong pagpamusil nahitabo niadtong Martes sayo sa buntag, Septiyembre 3, 2024 sa kadagatan sa Tanguingui Islet, sakop sa Madridejos.
Ang namatay giila nga si Rex dela Cruz, alyas Dodoy, 45, minyo nga taga Victorias City, Negros Occidental.
Base sa gihimong imbestigasyon sa Madridejos Municipal Police Station ubos sa pagdumala ni PLT Michael Joan Bañes nga ang maong panagatan nga Baby Trawl FB RJB nga giluwanan sa boat captain, ug laing upat ka mga crew ingon man sa biktima nga si dela Cruz.
Ang maong mga mananagat nangisda sa naasoyng dapit ang giingong girapido gamit ang tag-as nga kalibre sa armas diin naigo ang biktima nga si dela Cruz hinungdan sa iyang kamatayon.
Atol niining pagsuwat wa pa mailhi ang mga suspek. / DVG
