65 ka smuggled nga sakyanan gisakmit sa LTO

Mokabat sa 65 ka smuggled nga sakyanan ang nasakmit atol sa ronda sa Barangay San Isidro, Talisay City niadtong Lunes, Hunyo 9, 2025. 

Kini ang ikatulo nga lugar sa nasod human sa Quezon City ug Davao City nga gironda sa hiningusgan nga kampanya sa Land Transportation Office (LTO) batok sa ilegal nga gi-import ug gi-convert nga mga sakyanan.

Matod ni LTO Chief Assistant Secretary Vigor D. Mendoza II, ang mga unit nga naglakip sa minivans, multicabs, trucks, ug heavy equipment  ilegal nga gipasulod sa nasod gikan sa Japan isip right-hand drive nga mga sakyanan.

Gipang-convert kini ngadto sa left-hand drive. 

Kini nga matang sa modification nakalapas sa Republic Act 8506, nga nagdili sa rehistrasyon ug operasyon sa right-hand drive nga mga sakyanan sa Pilipinas tungod sa isyu sa kaluwasan sa publiko.

“Ang ating mensahe ay itigil na po ninyo ito. Tuloy-tuloy po ito, hindi po ito ningas-kugon. Ido-double time pa natin ang effort natin. There’s no stopping this,” matod ni Mendoza. 

Ang hiniusang operasyon gihimo sa LTO sa pakigtambyayong sa National Bureau of Investigation (NBI), Bureau of Customs (BOC), ug Philippine National Police (PNP, ubos sa direktiba ni Department of Transportation (DOTr) Secretary Vince Dizon. 

Gi-supervise kini ni Special Envoy on Transnational Crime Ambassador Markus V. Lacanilao.

Atol sa operasyon, usa ka babayeng Peruvian national nga giingong operator sa autoshop sa Talisay City ang gidakop human mogawas ang iyang ngalan sa padayon nga imbestigasyon nga naglambigit sa mga langyaw sa ilegal nga pag-import, pag-assemble, ug pagbaligya sa maong mga sakyanan.

“Strikto ang pagpapatupad ng batas sa pagdating sa bagay na ito para maiwasan ang aksidente,” ingon ni Mendoza.

Ang mga sakyanan gikataho nga gibaligya sa tag P200,000 ngadto sa P250,000 matag unit, ilabi na sa giusab nga minivan o multicab nga klase ug ang nakapalit nakahimo na og down payments sumala sa gibutyag atol sa raid.

Sumala ni Mendoza, ang operasyon sa Cebu nisunod sa susamang mga pag-raid sa Quezon City sa miaging bulan ug sa Davao City, ug kapin sa 40 pa ka right-hand drive units ang nasakmit. 

“These stores appear to be all connected. That is why Ambassador Lacanilao was here with us as part of the thorough investigation into this illegal activity because there were reports that this is run by at least one foreigner,” matod ni Mendoza.

Sa inisyal nga imbestigas-yon, ang mga sakyanan gi-import sa nasod, gi-convert, ug dayon girehistro sa giingong kakunsabo nga trabahante sa LTO. 

Si Mendoza nipaimbestigar sa usa ka buhatan sa LTO sa Mindanao nga posibleng nalambigit sa ilegal nga rehistrasyon.

“Lahat ng mga ito ay pananagutin natin base na din sa utos ng ating DOTr Secretary. Sa ngayon, malaliman ang imbestigasyon natin para matukoy ang lahat ng taong nasa likod nito,” matod niya.

Ubos sa Republic Act 8506, o An Act Banning the Registration and Operation of Vehicles With Right-Hand Steering Wheel, ilegal alang sa bisan kinsa nga tawo ang pag-import, pagrehistro, o pag-operate sa usa ka sakyanan nga right hand drive sa bisan unsang karsada sa Pilipinas. / CDF