Ben Madilynn
Giandam sa kapulisan sa dakbayan sa Sugbo ang lima ka mga bus nga himuong temporary custodial facility sa mga tawo nga magpabadlong atol sa Sinulog grand parade sa Enero 19, 2025.
Matod ni Police Lieutenant Colonel Maria Theresa Macatangay, deputy city director for operation sa Cebu City Police Office (CCPO), nga nag-request sila sa kagamhanan sa dakbayan sa Sugbo nga mogamit sa bus sa siyudad ug mitugot na niini si Cebu City Mayor Raymond Alvin Garcia.
Ang maong lima ka bus ipakatap kini sa rota sa Sinulog grand parade ug kung dunay mag pabadlong o mohimo og krimen sama sa pagpanguot, kawat, ug mohimo’g kagubot didto sila ibalhog sa mga polis ug force multipliers nga gila-tag sa kadalanan.
Matag bus dunay mga imbestigador ang gidestino nga mohimo’g dokumento ug kung unsa ka bug-at ang kaso nga iyang nalapas mahimong ilang pasakaan og kaso.
“Kini nga mga bust bus they will be supervised by our police investigators, so they will be properly documented and if warranted cases will be filed against them who will be temporarily detained there,” matod ni Macatangay.
Gipahibawo usab ni Macatangay nga hugot nila nga ipatuman ang giluwatan nga executive order ni Garcia nga Liquor ban sulod sa 300 metros radius sa Sinulog grand parade nga mag sugod sa alas 6:00 sa buntag hangtod sa alas 8 sa gabii sa Enero 18, 2025, Sabado samtang alas 12:01 sa kaadlawon hangtod sa alas 10:00 sa gabii inig Dominggo, Enero 19, 2025 atol na kini sa parada.
Wala hinuoy labot sa EO kadtong gawas na sa 300 meter radius diin mamahimo ra sila nga maka inom og ilimnon nga maka hubog.
Awhag sa kapulisan nga tumanon lang ang maong lagda aron nga magpabilin nga hapsay ug malinawon ang kapistahan ni Senior Santo Niño.
Estrikto usab nila nga idili ang mga street party nga usa sa mga tinubdan sa kagubot inig abot na sa gabii.
Gibutyag ni Macatangay nga kung duna silay mahibaw-an nga nag-street party ila lang una kini nga badlongon ug paundangon.
Hugot na usab ang monitoring sa kapulisan sa Central Visayas sa posibling pagpangabot sa mga kawatan gikan sa laing rehiyon sa Pilipinas.
Giangkon ni Macatangay nga matag Sinulog ang mga notadong criminal gikan sa kaulohan mobalhin usab sila sa dakbayan sa Sugbo human sa kapistahan sa itom nga Nazareno.
Tungod niini, gibutyag sa CCPO nga duna silay gitahasan nga mga police personnel nga maka sibilyan nga ang ang ilang trabaho mao ra ang pag lutos sa mga kawatan nga mosagol sa bagang duot sa mga tawo.
Giawhag niya ang mga tag-iyag boarding house ug apartment nga kung dunay mo abang sa ilang mga pasilidad nga kadudahan labing maayo nga mopahibawo dayon sa mga police aron mahatagan nila kini sa dinalian nga aksyon.
“This like a magnet for opportunist to come here and especially those that are involve in crimes against property ba kanang mga mangunguot mga kawatan kay attractive gyud ni nila nga events. We have not monitored though any threat kanang mga dagko nga grupo nga manganhi but we have not lowered our guards, actually we have intensified our intelligence network,” matod ni Macatangay.
Lakip sa giawhag sa kapulisan ang publiko labi na kadtong dunay mga gagmayng bata nga dalhon aron mosaksi sa kalihukan sa Sinulog nga bantayan nila kini tungod kay matag Sinulog duna gyuy mga bata nga mabuwag sa ilang mga ginikanan.
Kung mahimo butangan nila og name tags nga dunay ilang contact number aron dali sila nga matawgan.
GIKAN SA BOHOL
Gawas sa kapin 3,000 ka mga polis ug mga force multiplier nadugangan na kini karon tungod kay mihatag og augmentation ang Bohol Police Provincial Office ug dul-an
usab sa usa ka libo ang armadong kusog sa Pilipinas.
Tungod niini dili na mo ubos sa 4,000 ka security personnel ang ipakatap gikan sa Solemn Procession hangtod na sa adlaw sa Sinulog grand parade.
Samtang ang Police Regional Office 7 mimando usab sa mga police station sa kalungsuran sa probinsya sa Sugbo ug mga silingang syudad nga mopahugot usab sa ilang siguridad sa ilang tagsa-tagsa ka huresdiksyon.
Giawhag ang publiko nga kung dunay mamatikdan nga kadudahan sa ilang lugar, mahimong motawag sa ilang hotline nga 0954 983 1867. / AYB
