Ben Madilynn
Daghang mga Filipino ang nagtinguha nga mamahimo’ng rehistrado nga mga botante alang sa nasudnon ug lokal nga piniliay sa Mayo 2025 tungod kay aduna nay kapin sa 4 ka milyon nga naka-file sa ilang mga aplikasyon sa Commission on Elections (Comelec).
Base sa labing ulahing datus sa Comelec, aduna nay 4,057,001 ka mga aplikante nga mahimo’ng rehistradong botante, kinsa ning-file niadtong Pebrero 12 hangtod Hunyo 26.
Kaniadto, gibana-bana sa Comelec nga mokabat sa tulo ka milyon ang mo-apply aron mahimo’ng rehistrado nga mga botante sulod sa pito ka buwan nga voter registration period.
Niadtong miaging buwan lang dihang nakab-ot sa Comelec ang tulo ka milyon niini nga projected voter registrants alang sa nagpadayong registration period.
Sa gihapon adunay labing daghang aplikante mao ang Calabarzon nga adunay 696,555; gisundan sa National Capital Region nga adunay 561,714; ug Central Luzon nga adunay 477,016.
Sa laing bahin, ang Cordillera Administrative Region nga adunay 53,778 maoy dunay labing ubos nga ihap sa mga nagparehistro.
Ang mga kalihukan sa pagparehistro sa mga botante gihimo sa Lunes hangtod Sabado, lakip ang mga holiday, gikan sa alas 8 sa buntag hangtod sa alas 5 sa hapon sa tanang Opisina sa Election Officer sa tibuok nasod.
Gituyo kini aron mas sayon sa mga botante nga magparehistro.
Sagad anha na magtapok ang mga magparehistro sa katapusang pipila ka mga adlaw sa di pa matapos ang rehistrasyon.
Ang panahon sa pagparehistro sa mga botante gikatakdang matapos sa Septiyembre 30, 2024.
