47 ka balay naugdaw sa sunog sa Lapu-Lapu

Duha ka dagkong sunog ang niulbo niadtong Biyernes sa buntag, Mayo 30, 2025 sa managlahing barangay sa Lapu-Lapu City, diin 47 tanan ka balay ang gilamoy sa kayo.

Ang unang sunog nahitabo alas 9:50 sa buntag sa Sitio Iba, Brgy. Basak, diin paspas nga nikatap ang kayo.

Sa usa ka report, hingpit nga naugdaw sa sunog ang 19 ka balay ug partially damaged ang laing tulo, nga naka-apektar sa 25 ka pamilya o gibana-bana nga 170 ka mga indibidwal, kasagaran mga nag-abang ug mga trabahante sa Cebu Light Industrial Park.

Ang mga bakwit gipahiluna karon sa Canjulao Elementary School.

Ang insidente niabot sa ika-4 nga alarma ug gideklarar nga kontrolado na pagka-alas 10:59 sa buntag, ug hingpit nga napalong ang kalayo pagka-alas 11:41 sa buntag. Wala hinuoy gitaho nga naangol.

Pipila ka minuto ang milabay, pagka-alas 10:06 sa buntag, laing sunog ang niulbo sa Sitio Lubi, 2nd Street, Brgy. Canjulao.

Ang mga bombero gikan sa Babag Fire Station ug uban pang unit ang daling miresponde.

Kining ikaduhang sunog mas grabe, kay hingpit nga naugdaw ang 28 ka balay ug tulo ang partially damaged.

Baynte-siete ka pamilya o 150 ka mga indibidwal ang apektado sa maong sunog, nga gipasaka sa ika-4 nga alarma pagka-alas 10:47 sa buntag ug gideklarar nga napalong pagka-alas 11:19 sa buntag.

Usa ka indibidwal, ang 40 anyos nga si Manuel Ymbong, ang nakaangkon og minor injury.

Ang mga bakwit gikan sa Brgy. Canjulao gipahiluna karon sa Brgy. Basak Gymnasium.

Ang mga fire investigator nga sila si FO3 Jeffrey Gerodiaz, FO1 Marwin Olano, ug FO1 Vladimer Olano nagpahigayon og lawom nga imbestigasyon sa duha ka insidente.

Samtang, ang mga serbisyo sa emerhensya ug mga opisyal sa siyudad nagpadayon sa pag-assess sa kadaot ug naghatag og suporta sa mga pamilya nga nawad-an og pinuy-anan. / CAV