Ben Madilynn
Sa lima nga nangaangol, tulo ang nalandig sa tambalanan tungod sa grabeng samad ug bun-og nga nahiagoman sa lawas sa nahitabong karambola sa tulo ka mga sports utility vehicle (SUV) ug usa ka taxi sa transcentral highway sa Barangay Malubog, siyudad sa Sugbo, alas 2:45 sa hapon, Sabado, Septiyembre 14, 2024.
Nalambigit nga sakyanan mao ang Toyota Hilux pickup nga gimaneho ni Staff Sgt. Danilo Sapaga Bautista, 37, minyo, sakop sa Philippine Army, nadestino sa Reserve Command (Rescom) 7 ug taga Barangay Apas, siyudad sa Sugbo.
Ikaduhang mao ang Ford Ranger pickup nga gimaniho ni Revin Montesclaros Curaraton, 44, ug taga 66 Gorordo Avenue, Brgy. Lahug, siyudad sa Sugbo.
Ikatulo mao ang Toyota Hi-Ace nga gimaniho ni Ronnie Jake Agbay Ramil, 26, minyo, ug taga , Sityo. Maglinte, New Bago, lungsod sa Asturias, nga dunay mga pasahero nga sila si Ken Nia Gerundo, taga Basak San Nicolas, siyudad sa Sugbo, ug Florejane Codizar, Sityo San Miguel, Brgy. Sibugay, siyudad sa Sugbo.
Ikaupat mao ang taxi nga gimaniho ni Noel Laurenta, 48, minyo, ug taga 117 dalan F. Villa, Brgy. T. Padilla, siyudad sa Sugbo, nga may pasahero nga si Nilda Bohol, 71, ug taga Brgy. Cabangcalan, dakbayan sa Mandaue.
Subay sa imbestigasyon sa kapulisan, ang SUV nga gimaneho ni Bautista gisundan sa Toyota Hi-Ace ni Ramil nga nitadlas sa maong dapit nga dulhogon nga dalan sa pariho nga direksyon. Samtang si Curaraton nga nagmaniho sa Ford Ranger pickup ug si Laurente nga nagmaniho sa taxi ang nagtungas sa dalan sa opposite direction padulong sa sentro sa dakbayan sa Sugbo.
Apan matod pa nga pag-abot sa kurbadahon nga bahin sa maong dapit, matod pa, ang v-hire nikawas sa pikas lane hinungdan nga ni-counterflow ug nakabangga ang gikasugat nga taxi.
Ang v-hire padayon nga nidagan ug niigo na usab ngadto sa Ford Ranger pickup, ug ngadto sa Toyota Hilux nga service vehicle sa Philippine Army.
Ug sa kakusog sa impact, adunay lima nga mga nangaangol nga gidala sa Perpetual Succour Hospital ang nagrabehan. /
