Ben Madilynn
Moabot sa 30 ka mga panimalay ang hingpit nga naugdaw, samtang pito ang nakan-an sa kayo ug duha ang naangol human miulbo ang sunog alas 12:23 sa udto sa Domingo, Hunyo 1, 2025, sa Muslim Compound, Lower Paradise 3, Barangay Kinasang-an sa dakbayan sa Sugbo.
Nadawat sa Cebu City Fire Station ang alarma sa sunog alas 12:23 sa udto ug pagka alas 12:30 hingpit kini nga napawong nga gisaka lang ngadto sa first alarm.
Nagsugod matud pa ang kayo sa panimalay ni Hadji Said nga dunay duha ka pamilya nga nagpuyo.
Daling mikatap ang kayo ngadto sa mga silingang kabalayan.
Atol sa pag-ulbo sa kayo, duha ang nanga-angol nga silang Joalie Macadato, 18, kinsa nasamdan sa walang bukton ug walang tiil ug si Jhamalodin Macadato, 22, nga naglisud sa pagginhawa tungod sa bagang aso.
Base sa report sa Bureau of Fire Protection, moabot ngadto sa 40 ka pamilya o 150 ka mga indibidwal ang naapektohan sa maong sunog nga gibanabana’ng midanyos og P975,000.
Matud ni Senior Fire Officer Wendell Villanueva, ang information officer sa Cebu City Fire Station, nga padayon pa nga gisubay sa mga fire investigator ang hinungdan sa sunog.
Lakip sa ilang subayon ang mga pamahayag sa mga silingan nga ang hinungdan sa sunog mao ang ilegal nga koneksyon sa kuryente.
Giingon nga gibadlong na nila ang nagpuyo sa balay diin nagsugod ang sunog nga dili mag-jumper og kuryente apan wala matud pa kini mopatuo. / AYB
Source: 30 ka balay nasunog sa Brgy. Kinasang-an
