3 ka tawo giila nagpaluyo sa scam, computers giimbargo

ADUNAY tulo ka mga personalidad ang giila sa kapulisan nga posibleng nagpaluyo sa giingong investment scam nga nag-operate sa Barangay Kasambagan, Dakbayan sa Sugbo. 

Ang maong mga tawo nga wala pa nganli sa kapulisan lakip na ang mga opisyal sa BMJ Data Processing Services, gipaubos na sa imbestigasyon.

Kini human gironda sa mga sakop sa Anti-Cybercrime Group (ACG) 7 ang opisina sa BMJ Data Processing Services pinasikad sa search warrant. 

Mokabat sa 43 ka mga computer, laptop, ug uban pang kagamitan ang nasakmit sa maong operasyon.

Ang search warrant giluwatan ni Judge James Stewart Ramon E. Himalaloan sa RTC Branch 7 niadtong Mayo 26, 2025, tungod sa posibleng kalapasan sa Section 11 sa Republic Act 11765 (Financial Products and Services Consumer Protection Act) kalabot sa Section 6 sa RA 10175 (Cybercrime Prevention Act of 2012).

Ang BMJ Data Processing Services giingon nga nalambigit sa usa ka investment scam nga unang gibutyag sa usa ka YouTuber ug hacker. 

Sumala pa, nasulod sa hacker ang sistema sa computer sa kompanya apil na ang ilang CCTV camera.

Ang operasyon gisalmutan sa mga sakop sa Cebu City Police Office (CCPO) pinangulohan ni Police Colonel Enrico Figueroa, Criminal Investigation and Detection Group (CIDG) 7, Cybercrime Investigation and Coordinating Center (CICC) sa Department of Information and Communication Technology (DICT), ug sa Business Permit and Licensing Office (BPLO) sa Dakbayan sa Sugbo.

Matod ni Police Lieutenant Colonel Maria Theresa Macatangay, deputy city director for operations sa CCPO, ang mga nasakmit nga gadgets anaa na sa kustodiya sa ACG 7. 

Ibalik sab nila ang search warrant ngadto sa korte nga nag-isyu niini.

Gipaniguro sa kapulisan nga ilang bantayan ang tulo ka personalidad aron dili makagawas sa Sugbo ug sa Pilipinas. / AYB