3 ka LGBT gituli, nakadawat og tag P10 mil

Dugang tulo ka mga miyembro sa LGBT ang nakadawat og P10,000 matag usa human nipaubos sa libreng tuli nga panawagan sa kagamhanan sa Dakbayan sa Lapu-Lapu nga “walay apo ni Lapulapu nga pisot!”

Lakip sila sa gatusan ka mga batan-on nga gustong makab-ot ang pagka-ulitawo kay matod pa sa mga doktor, ang pagpatuli adunay daghang health benefits sama sa paglikay sa UTI kon urinary tract infection, sexually transmitted infections (STIs) o penile cancer.

Ang tulo ka LGBT nga natuli na niadtong Biyernes, Mayo 30, 2025, sa Hoopsdome, mao sila si alyas Layla, 22; Lesley, 26; ug Hanabi, 35 anyos, pulos managsilingan sa Sitio Sudtunggan, Barangay Basak. 

Ang Dakbayan sa Lapu-Lapu mohatag og insentibo nga P10,000 sa mga lalaki nga nag-edad og 20 pataas og P20,000 sa mga senior citizen nga magpatuli. Tumong niini nga walay magpabilin nga pisot sa dakbayan.

Niadtong Mayo 22, 2025, nakadawat usab ang 68 anyos nga lalaki og P20,000 human siya ni-avail sa libreng tuli, ang tinuig nga medical outreach program sa dakbayan didto sa Hoops Dome sa Barangay Gun-ob.

Nadasig ang maong senior citizen nga gitago sa alyas nga Noy Iking nga magpatuli human nisaad si Lapu-Lapu City Mayor ug Congressman-elect Junard Ahong Chan nga mohatag og cash incentives niadtong mga hamtong nga pisot nga magpatuli.

Alang ni Noy Iking, nasulbad ang iyang problema tungod kay ang maong kantidad maoy iyang kuhaan sa bayad sa kuryente human siya naputlan kay tulo ka buwan nga wala mabayri. 

Gawas ni Noy Iking, adunay duha ka 21 anyos nga pulos mga mentally challenged, 23 anyos nga construction worker ug ang 34 anyos nga sakop sa LGBTQ. Silang upat ang nakadawat og tag P10,000 nga cash incentives.