3 ka adlaw nang idili ang paggamit sa plastik sa Lapu

Idili na sa Siyudad sa Lapu-Lapu ang paggamit og plastik matag Biyernes, Sabado, ug Dominggo human sa mga kausaban sa ilang environmental ordinance. 

Kining kausaban giaprobahan sa ikatulo ug katapusang pagbasa atol sa regular nga sesyon sa konseho niadtong Miyerkules, Mayo 28, 2025, nag-usab sa mga adlaw sa pagpatuman kaniadto nga matag Miyerkules ug Sabado lang.

Matod ni Konsehal Celestino Aying, tsirman sa Committee on Environment and Natural Resources sa konseho, nga ang pag-usab nagtumong sa pagwagtang sa kalibog sa mga konsumidor ug negusyante bahin sa gitakda nga mga adlaw pagsulbad sa pagdaghan sa basura sa siyudad. 

Giaprobahan sa konseho ang mga kausaban sa Seksyon 5 ug 6 sa City Ordinance No. 15-003-2019, o “Environmental Friendly Ordinance of Lapu-Lapu City of 2019 Regulating the Use of Plastic and Prohibiting the Use of Plastic Drinking Straw.” 

Niadtong Agusto 8, 2019, giaprobahan ang ordinansa nagtinguha sa pag-regulate sa single-use plastics ug hingpit nga pagdili sa paggamit sa plastic drinking straws.

Ubos sa giusab nga ordinansa, ang mga negusyante di na mogamit sa single-use plastics ug gidasig nga  mogamit og papel, rattan, net bags, biodegradable nga alternatibo, o reusable packaging atol niining tulo ka adlaw nga gihatag.

Giawhag sab ang publiko sa pagdala og reusable bags o containers matag adlaw nga magpalig-on sa pagduso sa siyudad alang sa makanunayong eco-friendly nga mga pamaagi.

Ang Seksyon 5 sa ordinansa giusab aron mapatas-an ang adlaw paggamit sa single-use plastic items nga gitugot sa mga negusyante.

Gitugotan na karon sa siyudad ang paggamit sa roll bags sa pagputos sa frozen ug basa nga mga produkto sa pagkaon lakip na ang seafood, karne, ug uban pang mga butang nga adunay kaumog, ilabi na kon gamay ra ang liquid content. 

Ang bag-ong amendment nagpalig-on sa kasamtangan nga mga exemption nga nagtugot sa paggamit sa gagmay nga plastic packaging alang sa mga panakot sama sa suka ug toyo, ingon man ang plastic wrappers alang sa ice water ug ice candy.

Gipabilin sab niini ang exemption alang sa plastic cover caps nga kasagarang gigamit alang sa soft drink floats. 

Samtang ang pagdili sa drinking straws nagpabilin nga gipatuman kada adlaw, nga walay exemption.

Mga Silot

Sumala sa Seksyon 8 sa environmental ordinance, ang mga silot alang sa mga kalapasan magkadako depende sa klase sa negosyo isip small-scale o large-scale.

Alang sa small-scale businesses, ang unang kalapasan multa nga gikan sa P500 ngadto sa P1,000 inubanan sa pasidaan nga ang balik-balik nga kalapasan mahimong mosangpot sa dugang nga mga silot. 

Ang ikaduhang kalapasan, multa nga P2,000 ngadto sa P3,000 ug 15 ka adlaw nga pagsuspenso sa business permit nga giisyu sa Office of the Mayor. 

Sa ikatulong kalapasan, mag-atubang og multa nga P4,000 ngadto sa P5,000, uban ang posibilidad sa indefinite closure sa negosyo.

Alang sa large-scale businesses, ang mga silot susama ra apan mas taas ang multa. 

Sa unang kalapasan, multa nga P1,000 uban sa warning.

Ang ikaduhang kalapasan, multa nga P3,000 ug 15 ka adlaw nga pagsuspenso sa business permit. 

Ang ikatulo nga kalapasan, P5,000 nga multa ug ang indefinite suspension sa permit.

Ang ikaupat nga kalapasan, alang sa small ug large scale nga establisamento, moresulta sa permanenteng pagbawi sa business permit sa Office of the Mayor sa Lapu-Lapu City. / DPC