3 anyos ‘milabang’ sa sapa, nalumos

Bata nga gituohang nag-inusara nga niapas sa iyang inahan nga nanglaba, nilabang sa sapa hinungdan nga nalumos, niadtong alas 11:30 sa buntag, Hunyo 7, 2025 sa Sityo Ilag, Barangay Cambang, Dakbayan sa Toledo.

Ang maong bata giila nga si Ryle Laspoña, 3, taga Sityo Biswang, Brgy. Cambang-ug, Toledo gideklarar nga dead-on-arrival (DOA) sa Toledo District Hospital.

Si Patrolman Christian Celis, imbestigador sa Toledo Police Station nga nahinabi sa Superbalita Cebu mibutyag nga sigun sa pamahayag sa inahan sa bata nga si Eva, 25, nga sayo siyang nanglaba sa ilang mga bulingon ngadto sa tubod sa mga alas 8:00 sa buntag.

Matod pa nga iya lang gibilin ang iyang anak sa ilang balay nga nag-inusara nga nagduwa.

Way nakabantay sa maong bata kay ang iyang bana nanarbaho sa Dakbayan sa Lapu-Lapu.

Human siya nanglaba mipauli siya sa ilang balay mga alas 9:00 sa buntag ug sa iyang pag-abot wa na sa ilang balay ang bata hinungdan nga siya nabalaka og pinangita.

Na-diin diin na siya og sud-ong sa mga silingan pamasin nga nilaag lang ang iyang anak.

Apan nakugang nalang siya nga sa mga alas 11:00 sa buntag niagi sa iyang feed sa Facebook page nga adunay nag-post labot sa bata nga napalgang patay nga nalumos sa sapa.

Gikataho nga naanod si Ryle sa gilay-on nga 500 metros gikan sa ilang panimalay ug naabot na sa sa pikas sityo.

Ang biktima gidali sa pagdala sa Barangay service ngadto na sa Toledo City General Hospital apan si Dr. Jurrine J. Valencia, mideklar nga dead-on-arrival (DOA).

Nagduda ang imbestigador nga nilakaw kini aron sa pag-apas sa inahan nga nanglaba kay kanunay’ng moapas ang bata.

Adunay higayon nga kuyogan sa mga kaila paingon sa iyang inahan nga na-busy og panglaba, hinungdan nga anad na kining mag-apas-apas.

Apan atol nga kusog ang sulog og lawom ang tubig sa sapa, tungod sa pagbunok sa uwan sa bukid.

Gi-awhag sa kapulisan ang ginikanan nga kon adunay pagduda sa kamatayon sa bata, ipaubos kini sa autopsy.

Samtang ang Pagasa nipahinumdom sa publiko nga magmatngon ug mosubay sa advisories sa Municipal ug Local Disaster Risk Reduction Offices aron kalikayan ng disgrasya. / GPL, dugang taho ni Arvie N. Veloso