2 patay sa motor nga nagbangga

Patay ang duha ka drayber niadtong duha ka motorsiklo nga nagbangga sa dalan S. Osmeña, North Reclamation Area, habig sa Barangay Tejero, Cebu City sa alas 8:30 sa buntag, Biyernes, Hunyo 6, 2025.

Ang mga nangamatay giila nga sila si Alvin Dilao, 35, taga Talisay City, driver sa Kawasaki Fury adunay plate number GE 13375, samtang ang nibangga mao si Bugsy Nadal Quilestino, 18, taga Barangay Dumlog, Talisay nga nagmaneho sa Kawasaki big bike nga dunay plate number nga G638KA.

Sa imbestigasyon sa Traffic Enforcement Unit sa Cebu City Police Office nga base sa ilang nakita sa CCTV camera nga samtang niliko sa wala si Dilao sa 13th Avenue nga unang nagpasalipod sa SUV sa ilang pag-left turn sa eskina, niuna og labang si Dilao diin atol nga kusog ang dagan ni Quilestino nga paingon sa SRP tunnel. 

Nasungag ni Quilestino si Dilao resulta sa kusog nga impact hinungdan nga nalabay ang duruha sa sementado nga kalsada. 

Nabungkag ang motorsiklo ni Dilao ug grabe sab ang pagkaguba sa big bike ni Quilestino nga nasangit pa sa poste. 

Gitabang sa rescue team ang duruha nga nagkadugo ug gidala sa tambalanan apan wa na maagwanta ang grabeng kadaot nga ilang nahiaguman ug nakabsan sa ilang kinabuhi.

ANGKAS NAMATAY 

Sa laing bahin, patay ang 29 nga dalaga nga angkas sa motor sa iyang hinigugma niadtong alas 8:50 sa gabii, Huwebes, May 5, 2025 sa Transcentral Highway, Barangay Cansomoroy, Lungsod sa Balamban.

Ang mga sakay giila nga si Felchris Lopez, 33, taga-Barangay Hipodromo, Cebu City, drayber sa motorsiklo ug angkas niya si Michelle Azucenas, 29, taga Barangay Pasol, Lungsod sa Alcoy. 

Base sa imbestigasyon, ang duruha kuyog sa ilang barkada paingon sa Lungsod sa San Remegio, aron nga mag-outing gumikan sa long weekend, ilabi na nga holiday niadtong Biyernes, Hunyo 6. 

Gikataho nga nagdulhog ang motorsiklo gisakyan sa manag-uyab giingong wa na mopaak ang brake sa motor hinungdan nga wa na makontrol ug nilahos sa kanal. 

Si Acuzenas gideklarar nga dead-on-arrival (DOA) sa tambalanan sa Balamban. / dugang taho ni GPL