Ben Madilynn
Usa ka 16 anyos nga lalaki nga nalambigit sa pagpanulis sa duha ka mga estudyante uban sa usa ka hamtong nga giila sa kapulisan notadong tulisan, ang naluwas sa Labangon Police Station sa Guadalupe Village, Barangay Punta Princesa, dakbayan sa Sugbo atol sa follow up operation sa alas 3 sa kaadlawon, Dominggo, Septiyembre 8, 2024, apan nakaiyas ang kaubang hamtong niini.
Ang na-rescue giila sa kapulisan sa alyas nga ‘Jacob’, residente sa San Jose Village, Brgy. Tisa, siyudad sa Sugbo samtang ang nakaikyas nga tulisan giila nga si ‘Brent’, 21, taga Santa Monica Subdivision sa samang barangay.
Ang mga biktima nga ilang gitulis mao silang alyas ‘Johnny’, 18, ug ‘Mike’, 15, pulos taga Greyhound Village, Barangay Kinasang-an, kinsa kalit sila nga giduol sa duha ka mga suspek ug gipangtionan sa dala niini nga pistola dungan sa pagdeklarar og tulis.
Nakuha sa duha ka mga tulisan ang duha ka mga cellphone ug dayong sibat sakay sa motorsiklo.
Dali nga nangayo’g pakitabang ang mga biktima sa Labangon Police Station ug sa gihimong follow up operation, na-rescue ang menor samtang nakaikyas si Brent.
Nakuha pagbalik sa kapulisan ang cellphone sa mga biktima ug nakuhaan usab og kalibre .38 nga pistola ang menor de edad nga dunay duha ka bala.
Matod ni Police Major Eraño Regidor, hepe sa Labangon Police Station, nga si Brent ang lider sa grupo sa mga batan-on sa Tisa ug nasikop na siya kaniadto sa kaso gihapon sa pagpanulis.
“Kini nga grupo bangiitan ning mga tulisan. Kini si Brent nakadagan lang ni sa among paggukod ug mao ni mastermind nila, ang kaso ani niya tulis pud pero nakagawas lang, pagbalik niya, nag-train nig mga batan-on nga maoy mopuli niya diha,” matod ni Regidor.
Nagpadayon pa ang pagpangita sa kapulisan kang Brent nga giingong armado usab ni diin ang kasagaran nga target kining magbaktas panahon sa lawom na nga gabii. / AYB
