1,502 armas sakmit, 642 suspek nasikop sa illegal firearms

Moabot sa 1,502 ka loose firearms ang nasakmit sa Police Regional Office (PRO) 7 isip resulta sa ilang subsob nga kampanya batok sa ilegal nga armas gikan sa Enero 1 hangtod Mayo 31, 2025.

Base sa datos sa PRO 7, nakahimo sila og 1,469 ka operasyon sulod sa lima ka bulan nga niresulta sa pagkasikop sa 641 ka mga tawo.

Ubos sa pagdumala ni Police Brigadier General Redrico Maranan, ang hepe sa kapulisan sa Central Visayas, nakasakmit sab sila og 45 ka explosives ug 3,294 ka bala sa nagkalainlaing kalibre sa armas.

Apil niini ang pagronda sa mga himuanan og armas sa Dakbayan sa Danao nga maoy unang gipatutokan ni Maranan samtang nagkaduol ang eleksiyon niadtong Mayo 12, 2025.

Usa sa mga yawe sa kalampusan ang gihimong Oplan Katok, ang pagpadayon sa pag-awhag sa mga tag-iya og armas nga expired na ang lisensya nga itahan kini sa kapulisan samtang gilihok pa ang pag-renew sa ilang mga papeles.

Pinaagi sa 676 ka operasyon ubos sa maong programa, nakadawat ang mga police station og 710 ka armas nga kasamtangan nga anaa pa sa ilang kustodiya sa pagkakaron.

Matod ni Maranan nga dako ang natampo sa publiko sa ilang nakab-ot nga kalampusan batok sa loose firearms, lakip na ang ilang pagsalig sa kapulisan sa ilang trabaho.

“These achievements reflect not only the dedication of our personnel but also the growing trust and cooperation of the people of Central Visayas. Every illegal firearm recovered means a safer neighborhood and a stronger shield against violence. With your continued support, we are better equipped to carry out our mandate to ensure peace, security, and the rule of law in every corner of the region,” matod ni Maranan.

Ang kampanya batok sa loose firearms kabahin sa estratehiya sa PRO 7 aron maminusan ang krimen nga gigamitan og mga armas nga walay lisensya, aron magpabilin ang kahusay ug kalinaw sa rehiyon. / AYB