14 patay sa nahugno nga mina sa Indonesia

Mokabat sa 14 ka tawo ang namatay human nahugno ang usa ka quarry sa Probinsya sa West Java sa Indonesia sa Biyernes, Mayo 30, 2025, matod sa mga opisyal niadtong Sabado.

Kapin sa duha ka dosena ka tawo ang na-trap sa nagun-ob nga bahin sa dihang nahugno ang quarry sa Gunung Kuda sa Cirebon district.

Nakuha sa mga rescuer ang usa ka dosena nga samdan ug 10 ka patay’ng lawas gikan sa mga debris atol sa rescue operation.

Nakuha pa nila ang tulo ka dugang nga patayng lawas sa gabii sa Biyernes, ug laing trabahante ang namatay sa ospital, nga moabot sa 14 ang ihap sa tanan’g mga namatay, matod sa National Search and Rescue Agency sa usa ka pahayag. Lima ka tawo ang naospital tungod sa grabeng mga samad.

Gipakita sa mga local television report ang mga emergency personnel, uban sa kapulisan, mga sundalo, ug mga volunteers nga naglisud sa pagkawot sa quarry sa usa ka titip nga pangpang sa anapog, nga gisuportahan sa lima ka excavators, sayo sa Sabado.

Matod sa mga awtoridad, unom ngadto sa walo ka tawo ang gituohang na-trap pa.

Ang hinungdan sa pagkahugno gisusi pa, ug gipangutana sa kapulisan ang unom ka tawo lakip ang tag-iya sa quarry.

Si West Java Governor Dedi Mulyadi niingon sa usa ka video statement sa Instagram nga iyang giduaw ang quarry sa wala pa siya napili kaniadtong Pebrero ug giisip kini nga delikado.

Kaniadtong Biyernes, giingon ni Mulyadi nga gimanduan niya nga pasirhan ang quarry, ingon man ang upat pa nga susama nga mga lugar sa West Java.

Kasagaran sa Indonesia, ang ilegal o impormal nga operasyon sa pagkuha og kahinguhaan, adunay taas nga risgo sa kadaot o kamatayon.

Ang mga pagdahili sa yuta, pagbaha, ug pagkahugno sa tunnel pipila lang sa mga peligro nga kauban niini. Kadaghanan sa pagproseso sa balas, bato, o bulawan nga ore naglambigit usab sa paggamit sa makahilo nga mercury ug cyanide sa mga trabahante nga gamay ra o walay proteksyon.

Sa miaging tuig, usa ka pagdahili sa yuta nga gipahinabo sa kusog nga ulan ang niigo sa usa ka dili awtorisadong operasyon sa pagmina og bulawan sa isla sa Sumatra sa Indonesia, nga nakapatay sa labing menos 15 ka tawo. / AP