Ben Madilynn
Naglingawlingaw ra unta og kaligo sa sapa sa Sityo Suba, Barangay Poblaciona, Lungsod sa Liloan, Sugbo ang 14 anyos, namatay sa dihang nalumos.
Ang biktima nga tinun-an sa Grade 9 nga nailhan sa pangalang Zaijan, taga Barangay Cotcot, Liloan ang kuyog sa iyang mga higala niadtong pasado alas 10:00 sa buntag, Biyernes, Oktubre 4, 2024.
Ang biktima uban sa iyang mga barkada gikan nagduwa og basketball ug nagkasabot nga mangaligo sa sapa. Giingong miabak siya gikan sa tulay og mitugpa sa lilo nga bahin sa sapa hinungdan nga nalumos.
Gidali sa pagdala sa Danao City Hospital ang biktima ug gisuwayan sa pagtabang apan gi-deklarar nga dead on arrival. / DVG
