13 anyos naigo’s kilat

KIDAPAWAN CITY — Nagbangutan ang pamilya sa batan-on nga naigo sa kilat ug namatay alas 4:00 sa hapon, Martes, Hunyo 3, 2025, sa Midsayap, probinsiya sa Cotabato.

Giila ang biktima nga si alyas Kid, 13 anyos, ug nagpuyo sa Purok 2, Barangay Malamote, Midsayap.

Gibutyag ni Midsayap Chief of Police, Police Lieutenant Colonel Benhur Catcatan, nga dungan sa makusog nga ulan ug hangin, nagpasilong si alyas Kid sa payag sa lubnganan sa iyang lolo duol lang sa ilang gipuy-an.

Apan kalit lang milagapak ang kusog nga kilat, inubanan sa dalugdog nga daw makabungog.

Wala damha nga naigo ang biktima sa kilat nga nilatay sa atop sa payag hinungdan nga nawad-an kini sa panimuot.

Gitabang ang 13 anyos ug gidala sa balay tambalanan apan gideklara siya sa doktor nga dead on arrival.

Grabeng paso sa lawas ug mibuto pa ang ugat sa ulo sa batan-on nga maoy hinungdan sa iyang kamatayon tungod sa kakusog sa boltahe sa kuryente sa kilat.

Pasidaan sa mga awtoridad nga kung kusog ang ulan dili na mogawas sa ilang balay ilabi na kung dunay kilat ug basa ang lawas. (Edgar E. Fuerzas)