11 anyos nalumos sa taga hawak nga sapa

MAGPA-ENROLL unta niadtong Martes, Hunyo 10, 2025, ang 11-anyos nga si Erica Cabati-ngan, apan patay na siyang napalgan sayo sa buntag sa maong adlaw nga naglutaw sa sapa sa Sitio Kanipaan, Barangay Basak, Dakbayan sa Mandaue. 

Ang inahan ni Erica nga si Ruberosa Cabatingan, taga Sitio Alliance, Basak, Mandaue nibutyag nga katapusang nakit-an ang iyang anak nga buhi mga alas 6:00 sa buntag niadtong Lunes, Hunyo 9, kinsa nilakaw aron motabang sa iyang iyaan sa paglabay sa guba nga lingkuranan ug ipatimbang, apan wala na siya makauli sa ilang balay.

Sa dihang wala na makabalik si Erica nianang pagkaudto, gisugdan sa iyang pamilya ang pagpangita ug gi-post pa sab ang iyang pagkawala sa social media, nagpadayon ang pagpangita hangtod na sa gabii. 

Usa sa mga silingan ang nakabantay niadtong mga alas 7:00 sa buntag Martes, Hunyo 10, nga adunay naglutaw sa sapa ug sa unang tan-aw nagtuo nga munyeka apan sa dihang gisusi usa ka batang babaye. Ang maong dapit maoy sagad nga agian ni Erica sa iyang pagpauli sa ilaha. 

GIATAKE? 

Dako ang pagtuo sa inahan sa biktima nga posible nga naatlan nga giatake sa patol o seizures ang iyang anak samtang naglakaw pauli ug nahulog sa sapa.  

Butyag sa inahan nga sukad niadtong Disyembre sa miaging tuig, nagsugod ang maong balatian ni Erica gani dili kaayo nila pagawson human nga giatake siya sa patol sa tunghaan ug sa ilang balay. 

Nahugno ang kabanay sa biktima sa dihang nakunpirmar ang lawas nga naglutaw nga si Erica.

“Mao siguro na iya’ng nakuan [hinungdan] kay dinha [sapa] iya man nang mga suki, mga tarong man sad ang mga tawo dinha. Wala koy gidudahan,” matod ni Cabatingan.

Si Erica, ang ikaupat sa pito ka managsuon, nahinumdoman isip usa ka matinahuron ug manggihatagon nga anak.

Matod sa Mandaue City Police Office (MCPO), nakadawat sila og impormasyon bahin sa insidente mga alas 7 sa buntag ug ang tigpamaba sa MCPO nga si Lieutenant Colonel Mercy Villaro nagkanayon nga usa ka trabahante nga naglakaw daplin sa dalan kilid sa sapa ang unang nakakita sa lawas sa bata nga naghayang sa tubig.

Matod ni Villaro nga gisusi pa sa mga imbestigador ang insidente ug nangutana sa mga residente aron matino kon aduna bay nakasaksi sa nahitabo.

Dugang niya nga girekomenda nila ang autopsy aron matino ang tukmang hinungdan sa kamatayon samtang  gikonsiderar sa mga awtoridad ang medikal nga kondisyon sa bata tungod kay gikataho nganag-antos sa kombulsyon.

“All information, especially from direct relatives like the mother and father, whatever details they provide to us at the PNP, we will take everything into consideration,” matod pa Villaro. /dugang taho CAV, Zenn Dee Tejero, CNU Intern